ٹویشا شرما 12 مئی کو بھوپال میں اپنے سسرال کے گھر میں مشتبہ حالات میں مردہ پائی گئی تھیں۔ اس واقعے کے بعد ان کے اہل خانہ نے جانچ پر سوالات اٹھاتے ہوئے غیر جانبدارانہ تحقیقات کا مطالبہ کیا تھا۔ معاملے کی حساسیت اور عوامی توجہ کے پیش نظر مدھیہ پردیش ہائی کورٹ میں آزادانہ جانچ کی درخواستیں دائر کی گئیں، جن پر سماعت کے بعد عدالت نے پورا معاملہ مرکزی تفتیشی بیورو کے سپرد کر دیا تھا۔

تحقیقات اپنے ہاتھ میں لینے کے بعد مرکزی تفتیشی بیورو نے اس ماہ کے آغاز میں ٹویشا شرما کی ساس گری بالا سنگھ اور شوہر سمرتھ سنگھ کو گرفتار کیا تھا۔ دونوں کو خصوصی عدالت میں پیش کیا گیا، جہاں ابتدائی مرحلے میں انہیں پوچھ گچھ کے لیے مرکزی تفتیشی بیورو کی تحویل میں بھیجا گیا۔ جسمانی تحویل کی مدت مکمل ہونے کے بعد عدالت نے انہیں عدالتی تحویل میں بھیج دیا تھا اور تب سے دونوں بھوپال سینٹرل جیل میں بند ہیں۔