راگنی نائک نے جمعہ کو ایک پریس کانفرنس میں دعویٰ کیا کہ رام مندر میں 40 دن کے اندر 70 مرتبہ چوری کے واقعات پیش آئے، لیکن اس سلسلے میں تشکیل دی گئی خصوصی تحقیقاتی ٹیم کی رپورٹ آج تک منظر عام پر نہیں لائی گئی۔ انہوں نے سوال اٹھایا کہ آخر کس کو بچانے کی کوشش کی جا رہی ہے اور رپورٹ کو عوام سے کیوں چھپایا جا رہا ہے۔

انہوں نے کہا کہ وزیر اعظم نریندر مودی نے رام مندر کی تعمیر کا بھرپور سیاسی سہرا لیا تھا، لیکن اب نذرانہ کی چوری کے معاملے پر خاموش ہیں۔ ان کے مطابق جب تعمیر کا کریڈٹ لیا گیا ہے تو نذرانہ کی چوری کی ذمہ داری بھی قبول کرنی ہوگی۔ انہوں نے کہا کہ یہ عوام کے اعتماد کے ساتھ دھوکہ ہے اور وزیر اعظم کو ملک کے سامنے آ کر اس معاملے پر اپنا موقف واضح کرنا چاہیے۔